Mga titser seminaron sa CAIB vs cyber sex

Giasikaso karon sa Cebu City Anti Indecency Board (CAIB) ang pagpa-ubos og seminar sa mga magtutudlo ug prinsipal sa mga pampublikong tunghaan dinhi sa dakbayan sa Sugbo nga gitumong aron katudlo-an ang mga tinun-an pag-monitor ning mga law-ay'ng basahon ug pasundayag sa telebisyon ilabi na gyud ang gikabuangan karon diha sa internet nga cyber sex.

Gibutyag ni Dr. Rene Josef Bullecer, tsirman sa CAIB, dako ilang katahap nga dunay daghang mga tinun-an dinhi sa dakbayan ang nabiktima ug gihimong puhonan niining nagpasiugda sa sindikato sa internet nga cyber sex.

Una nang nakadawat og report ang CAIB nga misiaw karon kining maong binuang nga negosyo sa mga batan-on sa cyber sex sa mga tinun-an didto sa lungsod sa Argao ug gidudahan nila nga ania usab kini dinhi sa dakbayan.

Gitug-an ni Bullecer nga daghan sa mga tinun-an ang interesadong moapil ning maong negosyo sa cyber sex gumikan kay sa nahipos nga report sa CAIB bayran man og tag 20 ngadto sa 50 dolyares ang mga batan-on nga magpa-picture alang ning maong bastos nga katuyo-an.

Apan nadiskobrihan nga gihimo lang negosyo ang maong mga batan-on niadtong mga nagpasiugda niini gumikan kay ipakatap man sa lainlaing lugar ilabi na gawas sa nasud ang mga picture niini.