TANOD PATAY, POLIS KRITIKAL SA OSPITAL

Patay ang usa ka tanod samtang kritikal nga milandig sa tambalanan ang usa ka polis nga "mi-serve" og warrant of arrest sa usa ka Filipino-German citizen nga misukol dihang ilang giaresto diha sa Sitio Panaghiusa barangay Basak-San Nicolas ning dakbayan kagahapon sa kaadlawon.

Naagtang sa bala ang tanod sa Basak-San Nicolas nga si Mario Daclan, samtang naigo usab sa tiyan ug bukton si PO1 Christopher Bayato sakop sa Regional Investigation and Intelligence Division sa Police Regional Office 7.

Samtang mitahan kang kanhi konsehal George Rama ang suspek nga si Sodom Gonzales, 36, negosyante og baboy ug molupyo sa naasoy'ng dapit.

Sa interview sa Banat News sa imbestigador sa Homicide Section nga si SPO2 Alex Dacua mialegar si Bayato nga mi-serve sila og arrest warrant ngadto kang Gonzales gumikan sa kasong illegal possession of firearms.

Apan giingong nagmagahi ang suspek ug nahitabo ang panaglayog ug nailogan sa polis ang suspek sa kalibre 45 pistola niini apan giingong wala makahibalo si Bayato nga dunay "back-up" nga kalibre 9 mm ang suspek ug diha na nagsugod ang pinusilay.

Sa alegasyon usab sa suspek sa pakighinabi sa The FREEMAN/Banat News kini nagkanayon nga miabot si Bayato ug Daclan sa ilang dapit ug nangutana kun asa dapit ang Tagunol kay duna kini kasabot nga ginganlan og Mario Daclan nga ilang baligyaan og armas apan gi-"indiyan"sila niini.

Sa kakuryuso ni Gonzales iyang gisusi kun unsang armasa ang ibaligya niini apan giingong paggunit niya sa armas kalit lang miingon ang polis nga arestado siya gumikan sa kasong illegal possession of firearms, gani nagdala kini og arrest warrant nga dunay kapin P40 mil nga piyansa.

Nunot niini nahingangha si Gonzales kay kadalawong dako ug Domingo pa gyud nga gihatod ang arrest warrant maong ang iyang asawa midemanda sa polis sa pagpakita aron mabasahan niini ang maong dokumento apan giingong giwara-wara lang kini ni Bayato.

Dugang sa alegasyon ni Gonzales nga gipangayuan siya og kwarta sa duha aron dili nalang dayunon ang pagdakop kaniya apan nagmagahi siya hinungdan nga gikulata siya sa duha diha mismo sulod sa ilang tugkaran.

Nianang tungora, matud pa ni Gonzales nailog niya ang armas ni Bayato ug nahitabo na ang pinusilay, matud pa ni Gonzales nga dunay 'daghang' armas nga gidala ang duha niadtong tungura.

Si Dacua sa iyang bahin nagkanayon nga dunay mga testigos nga nakakitang gipatid-patiran sa polis si Gonzales samtang dunay armas nga 38 kalibre ang tanod nga mi-back up kang Bayato.

Pag-abot sa sulod nahitabo dayon ang buto-buto. Matud pa ni Dacua nga posibleng nailugan gyud si Bayato sanglit base sa gipanulti sa mga testigos kadiyot ra kaayo pagsulod human sa pagkulata nagbuto-buto na dayon.

Human sa pagdala sa mga samaran sa Cebu City Medical Center, si Gonzales mitawag kang Rama ug didto siya mitahan. Nakuha diha sa crime scene ang duha ka kalibre 9 mm pistola ug usa ka kalibre 45 nga paltik ug ingon man mga basiyo sa mga bala, samtang gisusi pa kun kinsa maoy nakapunit sa giingong 38 rebolber sa tanod.