Maestro apil sa Fratwar?

Maestro sa college of engineering sa usa ka unibersidad sa Talamban ang usa sa mga imbestigahan sa Homicide Section kalabot sa insidente sa pagpangulata sa usa ka sakop sa Scout Royal Brotherhood niadtong milabayng Huwebes sa gabii.

Si Jay Palima gitumbok sa duha ka mga tinun-an nga sila si Don Louie Ortega ug Jeffrey Duran Marte nga maoy usa sa tulo ka tawong mikomprontase kanila usa ka gabii una pa mahitabo ang pagkulata sa sakop sa SRB nga si Christian Peñalosa kinsa milandig sa tambalanan.

Wala pa hinuoy testigos nga makatumbok kang Palima nga maglambigit sa kaso ni Peñalosa sumala pa ni Homicide Section Chief Mario Monilar.

Giingong maong gikulata sila si Marte ug Ortega sa grupo ni Palima gumikan kay nasuko ang naulahi nga gitabisan siya sa duruha diha sa usa ka burger junction sa Nasipit.Wala pa hinuon nila mapa-blotter sa kapolisan ang insidente.

Gikaingong una pa mahitabo ang pagkulata kang Peñalosa nakit-ang gikomprontase ni Palima ang biktima apan laing mga miyembro sa Alpha Phi Omega ang mitabang og bunal og tubo sa ulo ug kalawasan sa biktima.

Gipatawag kagahapon sa Homicide Section ang mga miyembro sa SRB ug Alpha Phi Omega aron husayon ang insidente ug mahatagan og katin-awan ang pasangil batok kang Palima apan nagdumili kini pagluwat og pamahayag gumikan kay wala siyay abogado.

Nasayran nga si Atty. Noel Archival maoy abogado ni Palima kinsa tua pa sa Bohol apan mipasalig kini nga ang mga kadagkuan sa APO ang mopatahan sa ilang mga miyembro.