Peke nga dolyares sa SEAGames

Gikabalak-an ang pagkatap sa mga hinimong mini nga salapi ug mga mini nga dolyar niining nagsingabot nga pasko ug taliwala sa nagpadayong kalihukan sa South East Asian Games diin daghang mga turista ang mobisita dinhi sa siyudad sa Sugbo aron pagsaksi sa nahisgutang mga kompetisiyon.

Kini human usab na-diskubrehan ang pipila ka mga operator kon tig-imprinta niining mga fake nga salapi dinhi sa nasud nga gituohang planong ipakatap karong pasko.

Nunot niini nakadawat og daghang mga reklamo si konsehal Edgardo Labella gikan sa mga nagpakabanang lungsoranon nga posibleng motumaw kining maong binuang niining nagpadayong kalihukan sa Sea Games ilabina sa kadaghan sa mga langyaw nga turista nga ania karon sa Sugbo aron pagsaksi nga nagdala og mga dolyares.

Gumikan niini mopasar og resolusyon si konsehal Labella nga hugtanong nag-awhag sa National Bureau of Investigation (NBI-7) ug ingon man sa Business Permit Section sa Cebu City Hall aron maghiusa paghimo og subsub nga mga lakang aron mapakgang ug masumpo kining maong binuang.

Sentro sa gitinguhang pabantayan sa konsehal mao kadtong mga buhatan nga nagtago-tago og imprinta sa mga fake nga salapi ug mga dolyar ug kadtong mga illegal money changers.

Girekomendar usab sa konsehal diha sa mao niyang resolusyon susuhion gyud kon nakalukat ba og business permit sa siyudad ang tanang mga money changers nga nag-operate karon dinhi sa dakbayan ug gikinahanglan nga nakakuha sab kini og certification gikan sa Bangko Sentral ng Pilipinas (BSP).