Politika maoy motibo

Mga anggulo sa politika ug naglambigit sa trabaho o pagdumot ang gisubay karon sa kapolisan sa dakbayan sa Lapulapu sa nahitabong pagpangrakrak sa usa ka abogado sa duha ka wala hiilhing mga tawo nga nagsakay og motorsiklo.

Si Atty James Gupana, hingkod ang panuigon, minyo nga nagpuyo sa Pacific Villa sa barangay Pajac, siyudad sa Lapu-Lapu dali nga gihatod sa Mactan Doctors Hospital human kini mabiktima sa pagpamusil.

Sa asoy sa Banat News ni SPO2 Rolito Jumao-as sa Homicide Section sa kapolisan sa maong dakbayan nga ang mga mamumuno ni Atty Gupana nag-atang na daan sa usa ka eskina sa barangay Basak alas 7 pasado ang takna sa miaging Huwebes sa gabii.

Giklaro ni SPO2 Jumao-as nga sila si P01 Morfe Lajarane nga polis sa Zamboanga del Sur ug Titing Bong nga asset sa Military Intelligence Group 7 dinhi sa Sugbo ang ilang gidapit sa ilang buhatan sanglit diha man kini sa crime scene.

Dugang pa niya nga namatikdan nila nga naghupot og armas ang duha ug sanglit standard operating procedure sa ilang pakisusi ilang gidapit sa ilang buhatan ang duha apan dili isipo nga mga suspetsado.

Matud ni Jumao-as nga si Gupana ilang nahibaw-an nga mikandidato isip mayor sa siyudad sa Zamboanga sa 2004 election human mikandidato pagka board member sa tuig 2001 didto sa maong dapit ug napilde gihapon.

Ang laing mga anggulo nga gituohang maoy hinungdan sa maong pagpamusil ang panimalos nga naglambigit sa gihuptan niining mga kaso sa yuta ug ilegal nga drugas.