Pasalig sa CPPC: Veco padayong suplayan

Mipasalig ang kadagkuan sa Cebu Private Power Corporation (CPPC) ngadto sa mga opisyal sa siyudad sa Sugbo nga walay mahitabong mga pag-brown out ning mosunod nga mga adlaw gumikan kay dili na nila ihinayon ang pagputol sa gi-suplay nga kuryente ngadto sa Visayan Electric Company (VECO).

Gipadayag kini sa general manager sa CPPC Rogelio Lim nga mitambong sa gipatawag nga executive session sa konseho kagahapon sa buntag.

Lakip sa mitambung sa gipahigayung executive session mao ang kadagkuan sa VECO nga gilangkoban nila ni Ethel Natera ang tigpamaba sa maong kompaniya.

Gipadayag ni konsehal Jocelyn Pesquera dihang nahinabi sa Banat News nga mipasalig kanila ang duha ka mga opisyal sa CPPC ug VECO nga walay mahitabung pag-brown out ilabi na sa pagpahigayun karun dinhi sa dakbayan sa South East Asian Games gumikan kay dili na ihinayon ang paghunong og suplay niini og kuryente ngadto sa VECO nga maoy ilang gi-apod apod ngadto sa mga kunsomedor sa Metro Cebu Area.

Samtang gikonpirmar ni Natera ang kasabutan apan nagdumili lang kini paghatag og komentaryo kabahin sa napupos nang Interim Agreement tali sa CPPC ug VECO gumikan kay nagpadayon pa hangtod karon ang negosasyon alang sa pag-extend niini.

Human sa session nakigtagbo ang kadagkuan sa VECO ngadto kang Mayor Tomas Osmeña ug nipahibalo kini nga nasulbad na ang maong problema.

Gibutyag ni Osmeña nga laing gipasalig sa VECO ngadto kaniya nga bisan og mahunong pa ang gisuplay nga 62 megawatts sa CPPC duna gihapon silay igong suplay nga kuryente nga ikahatag sa ilang mga konsumidor.

Bugtong ilang gika-problemahan karon kun ugaling dunay mahitabong mga pagkadaut sa ilang mga substation sama diha sa Ermita nga posibleng moresulta sa pag-brown out sa mga epektadong lugar gumikan kay wala silay igong reserba nga kuryente.