Karnaper nadakpan

Usa ka suspetsadong karnaper nasikop sa mga elemento sa National Bureau of Investigation (NBI)ubos sa ayuda sa kapolisan sa Talisay diha sa Rabaya street Cebu South Coastal Road dakbayan sa Talisay.

Gidemalas ang suspetsado tungod kay ang kotse nga iyang gi-carnapped nahutdan sa gasolina diin diha kini mihunong tungod sa mga polis nga nag-atang kaniya.

Nasikop mao si Rosal Avelino dela Torre Jr. 30-anyos taga Lower Nivel Hills Lahug niining dakbayan.

Ang tag-iya sa kotse mao si Willington Yu 30-anyos usa ka negosyante nga taga lungsod sa Consolacion.

Base sa imbestigasyon sa kapolisan nga gisakyan ni dela Torre ang Honda Accord ni Yu nga nagtangag sa plakang WJZ-987 mga alas 9:30 sa buntag kagahapon diin nagparada kini diha sa Legazpi ug D. Jakosalem street niining dakbayan.

Ang mga sakop sa NBI nga migukod ni de la Torre nangayo og ayuda sa kapolisan sa Talisay hinungdan nga nasikop ang suspetsado.