Mga mag-uuma sa Palo padayong moangkon sa yuta

Padayonon sa mga mag-uuma sa San Agustin, Palo, Leyte ang pag-angkon sa yuta nga gihatag na kanila ubos sa Comprehensive Agrarian Reform Program bisan human sa gipasangil nilang pagmasaker kanila sa mga sundawo.

Ang yuta gipanag-iya sa asyendero nga si Pedro Margallo.

Usa sa mga survivors mao si Bernabe Burra, Sr. ang giatiman sa mga mananambal sa Sugbo kinsa may kahadlok pa nga dagiton sa militar.

Giklaro ni Burra nga mga mag-uuma lang sila ug dili tinuod ang pasangil sa militar nga sila mga sakop sa rebeldeng New People's Army.

Giasoy ni Burra nga paingon na unta sila sa bayanihan niadtong Lunes sayo sa buntag uban sa iyang asawa ug duha ka anak isip pagsanong sa gikasabutan sa mga CARP beneficiaries nga magtinabangay sa pagtikad sa yuta.

Wala magdahum si Burra nga mao na kadto ang katapusang higayun sa kinabuhi sa iyang asawa nga si Eufemia ug anak nga si Bernabe, Jr. human naigo sa bala sa mga armas sa mga sundawo samtang usa niya ka anak nga si Berlito grabe usab ang kahimtang sa pagkakaron.