Ambulansiya vs taxi

Ambulansiya nakabangga og taxi samtang nagkarga kini og pasyente kinsa biktima sa laing panagbangga sa mga sakyanan.

Ang ambulansiya sa lungsod sa Lilo-an nagpaingon sa dakbayan sa Sugbo aron ihatud ang usa ka pasyente sa Vicente Sotto Memorial Medical Center sa niaging gabii.

Luwan sa maong ambulansiya mao si Zacarias Lauron, 27 anyos nga taga Poblacion, lungsod sa Lilo-an.

Si Lauron nakaangkon og mga pangos ug mga samad sa agtang human nadasmag ang iyang gisakyan nga multi-cab nga pasaheroan ngadto sa usa ka 6-wheeler truck sa barangay Yati sa maong lungsod pasado alas 10 sa niaging gabii.

Gidala si Lauron sa ambulansiya padulong sa tambalanan apan sa paghiabot nila sa may national highway sa dakbayan sa Mandaue, nakabangga hinuon kini og taxi.

Wala na hinuon madugangi ang bun-og sa pasyente sa paghiabot niini sa tambalanan sanglit dili usab kusog ang pagkabangga sa ambulansiya ngadto sa taxi.