Fish dealers pugngan sa Pasil wa ikabalaka

Wala mabalaka ang kadagkoan sa Talisay City ning bahad nga pugngan sa taga Pasil fishport ang tanang negosyanteg isda aron dili kini makaintra sa Talisay fish port unya.

Matud pa ni Mayor Socrates Fernandez sa Talisay nga kining mga bahad ug panghulga dili angayang tuohan.

Igo lang mipahiyom si Fernandez dihang nabati niya ang hulga ni Acting Market Administrator Elpidio dela Victoria Jr. nga mamahimong "white elephant" ang fishport sa Talisay ug langawon lang kini sa umaabot nga panahon.

Alang kang dela Victoria nga usa ka pag-usik sa kuwarta sa gobyerno kining maong proyekto sa Talisay kay diil mahitabong mointra ang mga dagkong negosyanteg isda aron mamalhin sa Talisay fish port gikan sa Pasil.

Matud pa ni dela Victoria nga 70 porsiyento sa mga barkong panagatan nga tua sa gawas sa lalawigan managat, nakabali na og minilyon ka pesos nga kuwarta sa mga kapitalista'g isda sa Pasil.

Midugang siya nga kining 30 porsiyento sa maong mga panagatan may bali gihapon apan ginagmay na lang kay mga gagmay ra man kining mananagat, miingon si dela Victoria.

Busa gitataw ni dela Victoria nga way mahimong negosyo ang fishport unya sa Talisay ug langawon lang kini.

Apan alang kang Fernandez, kini miingon "ato lang unyang tan-awon kay unya na kita motuo kon mahitabo na."

Misalig si Fernandez sa mga nahaunang pamahayag ni City Administrator Aurora Econg nga ang mga negosyanteg isda sa Cagayan de Oro, General Santos, ug uban pang bahin sa Kabisay-an ug Mindanao misaad nga anha motumod sa ilang isda sa Talisay.