Kampanya padayon

Bohol - Nagpadayon karon ang hingusog nga kampanya sa kapolisan ning probinsya batok sa gikataho nga paghikat sa ilegal nga klase sa pagpanagat.

Nahibaw-an kini sa Banat News basi usab sa giluwatan nga kamanduan ni Gobernador Erico Aumentado.

Si Gobernador Aumentado miluwat og kamanduan ngadto ni Koronel Arturo Evangelista, hepe sa kapolisan sa probinsya nga mao gayud kini ang hatagan niya og prayoridad.

Gani sa miaging adlaw ang kapolisan sa probinsya malampuson nga nakasakmit sa mga kahimanan nga gamiton alang sa ilegal nga pagpangisda.

Gituhuan nga kini gikan sa dakbayan sa Sugbo og gipayuhot niadtong mga tawo nga nalambigit niini nga kalihukan.

Matud pa ni Aumentado nga kinahanglan gayud nga mahatagan sa igong pagtagad kining maong problema.

Nagkanayon ang gobernador nga kinahanglan nga kini mahatagan sa igong pagtagad ilabi na gayud sa mga lugar diin naa daplin sa kadagatan.