Pagbantay sa bird flu

Negros Oriental - Naghiusa karon ang mga negosyante nga nalambigit sa pagpamuhi og manok nga angayan mahibawo sa ilang buhaton ilabi na gayud kon adunay pag-igo sa bird flu.

Si Regional Director Eduardo Lecciones sa Department of Agriculture miingon nga iyang nahibaw-an nga nagka hiusa karon ang mga tag-iya og dagkong manokan sa probinsya.

Nalakip gani niini kadtong nagbase sa probinsya sa Negros Occidental human nila makita nga sila maoy apektado gayud kon muigo kining maong sakit.

Gitataw hinoon ni Lecciones nga kon matag usa nahibawo sa ilang angayan nga buhaton dako ang iyang pagtuo nga mahalikay gayud ang tanan sa maong sakit.

Nagkanayon si Lecciones nga sa pagka karon wala pay mga kaso nga natala sa nasud kabahin sa maong sakit.

Apan matud pa ni Lecciones nga kinahanglan gayud nga magbantay ang tanan.

Dili pa lang dugay si Lecciones miduaw ning probinsya og mihimo sa pagpangandam nga gihimo sa mga opisyal lokal.

Matud pa ni Lecciones nga walay laing angayan nga buhaton sa pagka karon mao ang pagpangandam.

Gawas niini angayan usab mahibawo ang tanan kabahin gayud sa maong sakit aron dili sila madala sa bisan unsang mga istorya nga makapasamot na hinoon sa maong problema.