SEA Games maigo sa brown-out

Namilegrong maapektuhan ang mga nakahan-ay nga kalihukan sa pagbukas sa 23rd South East Asian Games dinhi sa dakbayan sa Sugbo sugod karong Biyernes human mipahibalo ang kadagkuan sa Cebu Private Power Corporation (CPPC) nga putlon na nila ang pag-suplay og kuryente sa Visayan Electric Company (VECO).

Sa suwat nga gipadala sa general manager sa CPPC Rogelio Lim ngadto sa konseho sa siyudad sa Sugbo pormal nga gipahibalo niini ang ilang paghunong og suplay og 62 megawatts nga kuryente sa VECO sugod karong petsa 26 sa Nobiyembre adlaw'ng Sabado.

Gumikan niini daling giasikaso ni Konsehal Sylvan Jakosalem ang maong kalambuan tungod kay iyahang gikabalak-an nga maapektuhan ang mga nakahan-ay nga kalihukan sa Sea Games.

Matud sa konsehal nga kun dili gyud nila mapugngan ang desisyon sa CPPC paghunong og suplay sa VECO plano nga himuong prayoridad ang mga hotel nga maoy abtan sa mga atleta sa Sea Games ug ingon man mga lugar nga diin dunay duwa.

Gikabalak-an nga makasinati og mga pag-brown out ang pipila ka mga lugar dinhi sa dakbayan matag karun ug unya kon mahinayun ang maong bahad sa CPPC gumikan kay makasinati og pagkulang sa supply sa koryenti ang VECO sa ilang mga konsumidor.

Nasayran kang Lim sa suwat nga putlon nila ang pag-supply og koryenti sa VECO human nagdumili ang maong kompaniya pagpakig-negosasyon ngadto kanila aron ma-extend ang Interim Agreement niini sa maong petsa.

Nalatid sa maong kasabutan nga aprobado sa Energy Regulatory Commission (ERC) nga minus og dos porsiyento ang ibaligyang koryenti sa CPPC ngadto sa VECO kon itandi sa kantidad sa koryenti nga gibaligya sa National Power Corporation (NPC).

Si Ethel Natera ang tigpamaba sa VECO sa dinaliang pakighinabi sa Banat News mitug-an nga 23 porsiyento sa ilang suplay matag adlaw ang mawala kun ihinayon sa CPPC ang ilang giplano, wala na usab kini makahatag og ubang detalye sanglit giandam pa sa ilang buhatan ang ilang statement atol ning pagsulat sa balita.

Si Konsehal Nestor Archival sa iyang privilege speech kagahapon nagkanayon nga naa karon sa seryosong

sitwasyon ang dakbayan sa Sugbu nga maoy mo-host sa pipila ka mga events sa SeaGames dugang pa niini ang umaabot pang mga kalihukan.

Sa resolusyon ni Archival giawhag niini ang CPPC ug VECO sa pagkunsiderar sa kamanduan sa ERC gumikan kay nahibaw-ang kaniadto pa ang maong isyu wala masulbad ug karon nahibalik na usab. -Uban sa taho ni Edwin Ian Melecio