Amotan sa simbahan gipamugos sa mga pari

Gipanghimakak sa kadagkoan sa simbahan nga pugson na karon ang mga pamilya nga sakop sa ilang mga parokya nga mohatag og amot alang sa lainlaing mga proyekto sa simbahan.

Ang kadagkoan sa Blessed Sacrament Church nga nahimutang sa reclamation area mitataw nga sayop ang gipalakaw nga mga tabi-tabi nga dunay kamandoan gikan sa ilang kaparian nga pinugsanay na ang pagpaamot ngadto sa simbahan.

Usa ka lumulopyo sa barangay Lorega-San Miguel nga kanunay'ng moabag sa ipahigayong mga misa mipahibalo nga ang matag pamilya paamoton na og tag usa ka peso nga hinabang matag adlaw ngadto sa simbahan aron sa paghuman sa ilang gihimong proyekto.

Nahibaw-an hinoon nga adunay nagpadayon karon nga proyekto sa Blessed Sacrament Church nga pagpalapad sa maong simbahan, apan matud sa kadagkoan sa maong simbahan nga dili pinugsanay ang pagpaamot.

Ilang gitoohan nga kadtong nagsangyaw sa maong sayop nga inpormasyon, nagtinguha lang nga mapadali ang pagtigum og igong pundo nga salapi aron nga magamit sa pagpahuman sa pagpadaku sa simbahan sa ilang parokya.

Daghang mga lumulopyo sa barangay Lorega-San Miguel nga nakadungog sa maong pahibalo nga pinugsanay na ang pagpangolekta og amot sa simbahan ingon sa nahimangod tungod kay matud nila gisundog niini ang pamaagi sa laing relihiyon.