Talisay fishport sugdan

Ang seremonyas sa paglungag sa yuta o "ground breaking ceremony" sa tarokan sa fish port sa Talisay City ipahigayon na sa unang semana sa Disyembre.

Apan kon mahimo mas sayo pa niini, o sa kataposang semana sa Nobiyembre, matud pa ni city administrator Aurora Econg.

Ang unang bahin sa maong proyekto mao ang pagtukod sa "landing base" sa maong pantalan sa isda nga ipahiluna sulod sa 5,000 metro kuwadradong luna sa Tangke, Talisay.

Matud pa ni Econg nga upat ka mga kontraktor ang kwalipikadong mosalmot sa subasta niini nga naglakip sa WT Construction, Dakay Construction, Socor-Construction ug Geo Transport.

Ang P20 milyones nga proyekto paningkamotan sa kagamhanan sa Talisay nga matapos sa tuig 2006.

Inigkahuman niini anha na itumod ang mga isda nga gikan sa nagkalainlaing lalawigan nga maglakip sa Cagayan de Oro, General Santos, Bohol, Leyte, Negros, Masbate ug bisan ang sa Zamboanga.

Sayo niini gipahayag ni Mayor Socrates Fernandez nga ang kaugalingong budget sa dakbayan alang ning maong proyekto aprobado na.

Bisan ang mga hinabang gikan sa kagamhanan sa lalawigan nga balig P5 milyones; Department of Agriculture, P3 milyones ug ingon man sa kang Kongresista Eduardo Gullas ug sa Malacañang andam na ang tanan.

Human sa subasta kasugdan dayon ang pagpanday sa unang bahin niini hangtod na mahuman, matud pa ni Econg.