Polis gireklamo sa drayber: Mikulata, mi-staple sa dunggan sa drayber

Laing sakop sa Criminal Investigation and Intelligence Branch ang gireklamo karon human kini pasanginling nanukmag ug migamit pa og "stapler" aron ipiton ang dunggan sa usa ka PUJ drayber gumikan lang sa kalapasan niini sa trapiko.

Ang gireklamo mao si PO1 Albert Luardo sakop sa CIIB samtang ang mireklamo sa pagpangabuso mao si Oscar Sarte, usa ka PUJ driver nga magbiyahian sa Talamban ning dakbayan.

Si Sarte mipasangil nga nainit ang polis kaniya gumikan kay na-overtake-an niya kini samtang parehong nagpadulong diha sa Talamban, matud pa niya pag-abot nila sa Talamban Police Station kalit siyang gisukmag ni Luardo sa dughan. Niadtong Lunes iyang gidugang sa pasangil nga gikuha siya ni Luardo diha sa karsel sa Cebu City Police Office ug giposasan dayon gidala sa buhatan sa CIIB ug didto gidagmalan siya pag-usab.

Diha sa sulod sa buhatan giingong gipalingkod siya sa hangin ni Luardo uban sa lain pang mga polis dungan sa paglapdos kaniya og silhig lanot ug ingon man dunay mi-staple sa iyang dunggan dungan usab sa pag-ingon og "mosukol diay kag polis ha."

Nangangkon si Sarte nga wala siya pahibaw-a kung unsay iyang nahimong salaod ug nganong gidala siya sa buhatan sa kapolisan niadtong tungura.

Si Luardo sa pakighinabi sa The Freeman / Banat News mihimakak sa pasangil matud pa niya nga niadtong gabii sa adlawng Lunes, ang takna nga gialegar ni Sarte nga siya gikulata tua siya sa ilang balay ug natulog.

Mirason si Luardo nga iyang gidakop si Sarte kay wala kini sa iyang linya ug mibabag sa lane nga lusot ngadto sa Maria Luisa Village diin siya moliko pauli sa ila, dugang pa niini kalit nga miliko si Sarte sa tuo maong naigo ang iyang sakyanan apan wala manumbaling si Sarte ug milahos pa sa Sto. Niño Village ug didto na kini mihunong kay dunay mikanaog nga pasahero.

Nianang tungura gigukod ni Luardo si Sarte ug gibabagan ang PUJ niini dayong paila nga siya usa ka polis apan giingong giinsulto hinuon siya ni Sarte ug midemanda pa nga kun polis siya ipakita niini ang iyang ID.

Sumala pa ni Luardo nga giingnan siya ni Sarte og "Polis diay ka, pakit-a ko sa imong ID bi, nganong ako mang ihatag ang akong lisensya nimo?"

Bisan paman nainsulto giingong gipakita niya ang iyang ID apan wala motuman si Sarte sa paghatag sa iyang lisensya, aron malikay sa kagubot milahos sa Talamban Police si Luardo ug nagpatabang sa mga polis didto aron pagbutang og roadblock.