Manaygonay higpitan - Jack

Gimanduan ni konsehal Sylvan "Jack" Jakosalem ang kapulisan dinhi sa dakbayan alang sa hugtanong pagpatuman sa ordinansa sa siyudad nga nag-regulate niadtong mga tawong mamasko panahon na sa lawom nga kagabhion nonot usab sa nagsingabot nga silibrasyon sa pasko ug bag-ong tuig karung bulan sa Disyembre.

Gipahinumduman sa konsehal ang Cebu City Police Office (CCPO) pinangulohan ni Supt. Melvin Gayutin kabahin ning maong carolling ordinance sa siyudad.

Kini gumikan kay mitumaw karun ang mga kabalaka nga posibling dunay uban ang magpakaaron-ingnon nga mamaskohay ang mopahimulos sa higayun sama sa pagpangawat.

Nalatid sa carolling ordinance nga kadtong mamaskohay gitugutan lang nga makapahigayun og carolling gikan sa alas 7:00 sa buntag hangtud sa alas 10:00 sa gabii.

Kadtong makalapas sa maong balaod pabayron og multa nga P500 o ba kaha pagkabilanggo sulod sa lima ka adlaw.

Nonot niini gi-obligar sab kadtong mga mamaskohay nga gikinahanglan nga molukat og permit sa City Treasurers Office sa City Hall aron mamahimong legal ang himoong pagpamasko niini.

Pagkakaron namatikdan nga duna nay mga tawo ang nagsugod sugod sa pagpamasko sa mga kabarangayan dinhi sa dakbayan nonot ning nagkaduol na sa mga adlaw sa pasko.