Si FO3 Johnson Joselito sa pakighinabi sa Banat News nagkanayon nga nagsugod ang sunog diha sa ika-duhang andana sa balay ni Generoso Arnaiz diha sa Sindulan.
Nadawat ang alarma 1:21 sa hapon ug giisa kini ngadto sa general alarm gumikan usab kay ginama kadaghanan sa kahoy ang kabalayan ug ingon man naghatag og problema ang hangin gikan sa dagat.
Nakontrolar ang kayo 52 minutos.Wala hinuoy natahong nasamdan o ba kaha naangol sa insidente gawas lang sa mga kabtangang naugdaw.
Matud pa ni Johnson nagproblema sila sa tubig gumikan kay ang tulo ka mga fire hydrants diha sa duol hinay kaayo ang pressure sa tubig nga nakapasamot sa kalangay, diha na kini mikusog dihang gitawgan ang Metro Cebu Water District nga pakusgan ang ilang tubig.
Sa sayo pa niana ang MV Samar Star nga gipanag-iya sa Maypalad Shipping nahiagum usab sa sunog human aksidenteng natagakan og baga gikan sa giwelding nga twin deck diha sa ibabaw ang bodega niini.
Tulo ka trak sa bombero ang miresponde niini ug dali ra hinuon napawong ang kalayo apan midanyos usab og P5,000 samtang naangol usab ang Port Captain nga si Venancio Maribong kinsa miapil sa operasyon pagsanta sa kalayo sa iyang barko.
Kining duha ka sunog maoy ika-walo na ka insidente dinhi sa dakbayan sulod ning bulana. Si Mayor Tomas Osmeña daan nang mipasidaan nga mas mograbe pa ang mga mahitabong sunog sa umaabot nunot niining umaabot nga kapaskuhan gumikan sa mga dayan-dayang sub-standards nga makaingon sa sunog.
Kasagaran sa mga naugdaw ning bulana mao kadtong mga dapit diin gipuy-an sa mga eskwater ug kadtong mga luna nga dunay wala pagkasinabtanay tali sa mga namuyo ug nanag-iya sa luna.
Gibana-banang dul-an na sa P10 milyones ang danyos sa maong mga sunog gawas pa sa nahimo niining kadaut sa pangabuhian sa mga biktima.