Police asset giihaw

Usa ka gisuspetsahang police asset giihaw sa mga gituohang badlungon sa barangay Tejero ning dakbayan niadtong milabay'ng gabii diha mismo sa duol sa tugkaran sa ilang barangay hall.

Ang gitabanga'g dunggab ug namatay mao si Noel Garbo,28, molupyo sa maong dapit , samtang giila ang usa sa lima ka mga suspek nga mitabang pagpatay sa biktima mao si Pagong Araneta, usa ka giingong badlungon sa ilang lugar.

Sumala pa sa imbestigador sa Homicide Section nga si PO3 Bobby Escarlan, ang biktima kasamtangang nag-text diha sa may taytayan atubangan sa Tejero barangay hall dihang giduol sa mga suspek.

Diha-diha gikatahong gitabangag duslak ang biktima hangtud nga kini nabuy-od sa dalan. Dali untang gidala sa Cebu City Medical Center si Garbo apan gideklarar kining dead on arrival.

Sumala pa ni Escarlan ang biktima gidumtan sa mga suspek gumikan kay kini maoy ilang gidudahang tigsumbong sa mga binuang ug ilegalista diha sa ilang barangay ngadto sa kapolisan sa Waterfront police station.

"Gidumtan siguro ni siya sa mga suspek kay gidudahan lagi kuno ni siyang "turo" kay asset kuno ni siya ni SPO1 Francisco Balansag," sumala pang Escarlan.

Gisuwayan og kuha sa Banat News og pamahayag si Balansag kagahapon apan wala kini sa ilang buhatan