Adik nanghagis gipusil sa sikyu

Gikatahapang adik nga nanghagis napusilan sa iyang silingan nga security guard gamit ang .38 kalibre niadtong Sabado sa buntag diha sa Barangay Looc dakbayan sa Danao.

Ang biktima gituohang ubos sa impluwensiya sa ginadiling drugas ug nanghasi sa balay ni Miguel Pasay nga iyang bayaw.

Si Tereso Villarosa, 49-anyos kinsa suspetsado sa pagpamusil nagkanayon kagahapon sa pakighinabi niini sa Banat News nga ang biktima nga si Jonebert Coronel 23- anyos residente sa nahisgutang lugar nagdala og kutsilyo, miagi kini dapit sa ilang gipuy-an og gikan na nga nanghasi didto sa balay sa iyang bayaw.

Matud pa ni Villarosa nga gibadlong niya si Coronel ug iya kining gisultihan nga ipatago ang gidala niining kutsilyo tungod kay nangahadlok ang iyang mga anak. Apan nasuko hinuon si Coronel og mihamag kini ngadto ni Villarosa.

Si Villarosa suspetsado midungag nga mipabuto siya og usa ka warning shot apan padayon nga midasmag kaniya ang biktima hinungdan nga napugos siya sa pagpusil sa tuong tiil niini.

Ang biktima dali nga gidala diha sa Danao district Hospital ug ang suspetsado mitahan sa iyang kaugalingon ug sa .38 kalibre nga pusil nga dunay tulo ka buhing bala ug duha ka kabhang sa mao usab nga kalibre ug maoy iyang gigamit sa pagpusil sa biktima sa kapolisan sa Danao .t