Fishport sa Talisay tukoron sunod tuig

Ablihan na karong petsa 23 niining buwana ang bidding sa giplanong takurong fish port sa Talisay diin anha sa Barangay Tangke ibutang karong sunod tuig.

Aduna nay upat ka bidders nga mipadayag moapil sa bidding sa nahisgutang proyekto, kini mao ang WT Construction, Soccor Construction, Geo Transport Construction ug Dacay Constrcution.

Si Talisay city administrator Aurora Econg nagkanayon nga ang nahisgutang fish port dunay duha ka phase diin P35 milyones ang gahin nga budget niini.

Ang unang phase dunay P20 milyones ang budget.

Matud pa ni Econg nga ang pundo para sa maong proyekto gikan sa mga lokal nga ahensiya sa gobiyerno ug si Kongresista Eduardo Gullas sa unang distrito sa Sugbo maoy naningkamot nga makakuha og pundo para sa nahisgutang proyekto.

Si Econg midugang nga ang maong proyekto makahimo og economic enterprise sa dakbayan tungod kay ang mga tindera nga gipapahawa gikan sa Carbon ug Pasil makapwesto na unya og paninda para sa ilang panginabuhian.

Ug ang mga fishing vessels nga gikan sa nagkalain-laing lugar pwedeng mo dunggo para sa ilang mga isda.

Gibutyag nga aduna nay duha ka mga fish brokkers gikan sa General Santos city ug Cagayan de Oro ang nakigsabot sa dakbayan nga mipadayag og interes nga mosuplay og isda inig ka human sa proyekto.