Gilusad ang maong ronda pinasikad sa pito ka search warrants nga gipagawas ni Regional Trial Court Judge Geraldine Faith Ycong batok sa mga drug personalities sa maong dapit.
Sila si Inspector Francisco Baguio, PO2 William Homoc, PO2 Victor Pepito ug PO2 Romeo Cabras uban sa mga sakop sa gi-augment nga Regional Mobile Group mironda sa mga panilamalay nila ni Kamad Marohom, apan wala kini sa iyang balay.
Apan tulo ka tawo ang naabtan diha sa iyang balay ug gipangdakop human makakuha ang kapolisan og duha ka medium size, upat ka small size nga pulos dunay sulod nga gidudahang shabu, 18 ka mga sachet nga may mga residue sa gituohang shabu, usa ka kalibre 38 rebolber, usa ka magazine sa kalibre 45 pistola ug 14 ka mga buhing bala niini, duha ka buok nga kalibre 22, usa ka cellphone, usa ka mini nga P1000 bill ug mga drug paraphernalia.
Samtang ang grupo ni PO2 Cabras misikop usab kang Sandy Loquero alyas Sandy Doe nga nabantog usab nga si alyas "Baba", 31, istambay molupyo sa maong lugar diin nakuhaan kini og usa ka dakong plastik, tulo ka gagmayng plastik nga pulos may sulod nga gidudahang shabu, drug paraphernalia, usa ka icepick ug usa ka espadang kris.
Laing gironda mao ang usa ka naila lang sa ngan nga "Ahmad" apan nakaikyas kini, nakuha sa balay niini ang usa ka medium size plastic nga may sulod nga gidudahang shabu, usa ka cellphone, duha ka two-way handheld radio nga giingong gigamit sa pagmonitor sa posibleng pagpangronda sa kapolisan, usa ka surveillance camera ug mga drug paraphernalia.
Ang grupo usab ni PO2 Pepito nakadakop ni William Sanchez Yaon,24, kinsa nakuhaan og tulo ka sachet nga dunay lama sa gituohang shabu, drug paraphernalia ug usa ka kalibre 357 rebolber nga may lima ka buhing bala niini ug laing 12 ka buhing bala sa kalibre 38 ug usa ka basiyo niini.
Laing nasikop diha sa panimalay ni Alimoden Nasser Mamantak mao sila si Candy Mediko Alawis,37, taga Marawi City ug kapuyo niining si Maginda Canoy, 30, taga Canjulao Lapu-Lapu diin nakuhaan sila og mga drug paraphernalia ug mga sachet nga dunay mga lama sa shabu.
Si Mamantak, kinsa nadakpan na pila palang ka semana ang nakalabay diha sa Saak, Lapu-Lapu uban sa laing kauban gumikan sa paghupot og kalibre 45 pistola nga may duha ka magazine ug linibong kwarta.Nakapiyansa si Mamantak sa maong kaso.
Ang mga molupyo sa maong dapit mireklamo sa kapolisan sa pagsigeg pabuto ni Mamantak maong gironda kini sa kapolisan.
Laing nasikop mao sila si Marivic Llanes,37, ug usa ka minor nga 16 anyos nga kabanay niini human makuha diha sa ilang panimalay ang tulo ka paketeng may sulod nga gidudahang shabu, drug paraphernalia, usa ka barrel sa kalibre 45 pistola, usa ka 38 rebolber nga may usa ka buhing bala, usa ka bala sa kalibre 22 ug P700 cash.Ang subject sa warrant nga si Julieto Llanes alyas Joselito nakaikyas atol sa ronda.