Kanal sa Tabunok hinloan - engineering

Nahusawan ang kaguol sa mga molupyo sa likod sa merkado publiko sa Tabunok, Talisay City dihang misaad ang kagamhanan nga hinloan ang kanal nga nagbugwak og grabeng baho.

Matud pa ni Engr. Audie Bacasmas, ang city engineer sa Talisay nga nagpunay lang sila og hinlo sa maong kanal apan sigehan usab og labay og hugaw sa mga molupyo.

Si Bacasmas milihok gumikan sa sagunson nga reklamo sa mga katawhan sa kabaho sa imbornal sa palibot sa merkado nga maoy hinungdan nga daghan nang nataptan og sakit sa maong lugar.

Nanira na usab ang ubang mga kan-anan kay wa nay mga kustomer gumikan sa kabaho.

Sayo niini si Boy Rosagaran, usa sa mga nagpuyo sa likod sa merkado miingon nga dili na nila maantos ang kabaho sa ilang palibot.

Kini tungod sa pagkabara sa inagos nga tubig gikan sa merkado ilawom sa imbornal sa likod sa merkado.