Wa tugoting manguyab misulay'g pakamatay

Dalagang wala tugoti sa iyang ginikanan mag-uyab-uyab misulay pagkutlo sa iyang kinabuhi diha sa iyang lawak ginamit ang usa ka bakos apan napakyas kay nasakpan sa iyang maguwang nga lalaki sa milabay'ng adlaw.

Si Mary (dili tinuod nga pangalan), 18 anyos, molupyo sa Basak ning dakbayan naabtan sa maguwang nga si Nelson nga nagdiwalwal na ang dila kay may hikot nga bakos sa iyang liog maong dali kining gidala sa Cebu City Medical Center.

Matud pa nga ang dalaga nasakpang nakigktia sa iyang hinigugma apan gumikan kay gidid-an kini sa iyang mga igsuon ug ginikanan nga makigrelasyon nakasab-an ang maong dalaga. Gumikan niini wala na makaagwanta ang babaye hinungdan sa pagsuway niini og hikog.

Samtang sa laing bahin, patay ang usa ka bana human maghikog sulod sa ilang lawak niadtong miaging adlaw didto sa Sitio Sak-sak Barangay Canibuang lungsod sa Catmon.

Si Nestor Oro, 48 anyos, napalgan sa iyang kaugalingong anak nga nagbitay sa ilang lawak gamit ang 1.5 metros nga pisi nga gihigot sa iyang liog ngadto sa kisami. Gisulayan pagtabang ang biktima sa pamasin nga aduna pa kini kinabuhi apan pakyas sila.