Usa ka bala diha sa iyang nawong ug dughan ang mitapos sa kinabuhi ni Michael Gutierrez, hingkod ang panuigon molupyo sa San Vicente, Subangdaku dakbayan sa Mandaue ug negosyante og baboy samtang naangol usab ang uyab niining si Marilou Zepra,35, taga Sitio Walingwaling sa barangay Opao sa samang dakbayan.
Apan gidemalas ang namanhig nga si Donde Laurel Perez,31, taga Sitio Telecom, Barangay Cabangcalan ug nanginabuhi sa pagpamasahero og traysikad sa samang dakbayan human maabti sa mga sakop sa Station 1 nga sila si PO1 Renato Canha ug PO1 Roberto Neri.
Sumala pa ni Inspector Rosario Ceniza ang deputy chief sa Station 1 sa Mandaue City Police Office mitug-an sa Banat News ang suspetsado nag-atang nang daan diha sa maong dapit ug dihang miagi ang Honda CRV nga may plakang GRX-1861 kolor silver kalit nga gibanhigan ang mga sakay niini.
Matud pa ni Ceniza ang suspek mibutyag kaniya nga usa na ka bulan ang milabay aksidente niyang nadasmagan ang sakyanan sa biktima gumikan niadto gikulata siya (suspek) sa sakay niini maong iyang gidumtan ang maong nangulata niya.
Kagahapon daling gidala ang duha sa tambalanan sa Mandaue District Hospital apan gideklarar nga dead on arrival si Gutierrez samtang luwas na usab si Zepra.
Nakuhaan ang suspek og usa ka kalibre 357 rebolber nga may 13 ka buhing mga bala. - Edwin Ian Melecio uban sa report ni Romeo Limpangog