Mga seminario gihigpitan: Binghay

Gihigpitan karon sa mga seminario kun eskuylahan sa pagka-pari ang pagdawat og mga estudyante nga may pagkabayot ang kinaiya.

Matud pa ni Msgr. Esteban Binghay, episcopal vicar sa archdiocese sa Sugbo nga gitumong kini aron dili mahinayak ang estudyante sa pagka-pari.

Ang balaod sa pagdili sa mga bayot nga mag-pari dugay nang gipatuman sa simbahan, matud pa ni Binghay.

Susama ra usab kahigpit niini ang pagdawat niadtong mga babaye nga gustong mag-madre.

Midugang si Binghay nga ang pagka-pari ug pagka-madre dili yanong butang nga bisan kinsa lang ang angayang pasudlon.

Kun higpit ang balaod niini alang sa iyang mga aplikante o estudyante, kini tungod kay gilikayan sa simbahan ang makadaot sa moral sa kaparian ug sa katibuk-ang simbahan, matud pa ni Binghay.

Gabi ang mga estudyante nga kadudahan ang kinaiya, batasan, linihokan ug disposition, ipa-eksamin gyud sa mga "psychologist" pagsiguro nga dili bayot ug tinuod siyang lalaki.

Bisan sa mga magmadre, gikinahanglan usab kadtong mga babaye nga ligdong gyud og baroganan nga dili dali matintal sa mga lalaki ug babaye.

Ang pamahayag ni Binghay may labot sa mga isyu bahin sa giingong mabaniog na sa simbahan ang pagpapha niadtong mga pari nga bayot.

Hinuon dinhi sa Cebu walay namatikdan si Binghay nga bayot nga pari.