Indian gitudlo's babaye, gipusil

Gitudlo una sa usa ka babaye una pa gipusil ang usa ka negosyanteng Indian diha sa gipanag-iyang restobar sa dalan Escario barangay Camputhaw ning dakbayan niadtong Miyerkules sa gabii.

Samdan sa iyang tiyan ug likod nga gidala sa pribadong tambalanan ang biktimang si Zurgit "Johnny" Singh, 43, nga nanag-iya sa Time 2 Dyn Restobar human kini pusila sa wala mailhing lalaki.

Base sa gihimong imbestigasyon nila ni SPO3 Zenaido Pastrorfide sa Homicide Section ang suspek luwan sa usa ka motorsiklong dunay kaubang back-up nga mao usab ang drayber niini kalit nga mipusil sa biktima.

Dugang pa niini una pa mahitabo ang pagpamusil dunay babayeng luwan sa usa ka kolor puting awto nga mihunong sa tungod sa restobar, minaog ang babaye ug gitudlo ang biktima samtang ang mga suspek nagtan-aw.

Human molakaw ang babaye kalit nga gipusil sa suspek si Singh makadaghang higayon, ug daling miikyas padulong sa dalan Archbishop Reyes ang mga suspek.

Usa ka basiyo sa kalibre 45 nga bala ang narekober ni SPO2 Mario Revilla sa Mobile Patrol Group.

Gisubay na karon sa kapolisan ang anggulo sa love triangle, personal nga kaaway o ba kaha sa panagribal sa negosyo.