9 balay sa sundalo naabo sa sunog sa Apas

Siyam ka balay nga gipuy-an sa mga sundalo ang hingpit nga naabo ug duha usab ang nadanyos human sa sunog diha sa sitio Sook barangay Apas ning dakbayan sa Sugbo kagahapon sa buntag.

Si SFO2 Felix Romero mitug-an sa Banat News nga higpit nga naugdaw mao ang mga balay nila ni George Cinco diin giingong nagsugod ang sunog ug mitakod sa mga sikbit nga kabalayan.

Naugdaw nga mga balay gipanag-iya nila ni Antonio Belleza, Glen Cuadra, Leopoldo dela Peña, Danilo Valencia, Leonardo Pardo, Rodulfo Lopez, Amparo Novello ug usa ka naila nga Astodillo kinsa dunay mga kabanay'ng mga sundalo.

Samtang nadanyos usab ang balay nila ni Angelina Barrios ug Brenda Gicole, wala hinuoy natahong nasakitan sa insidente.

Matud pa ni Romero ang sunog miulbo alas 11:23 sa buntag ug nakontrolar sulod sa 42 minutos human giisa ang 3rd alarm, sumala pa sa pasiunang imbestigasyon sa kabomberuhan nga dunay mga batang nabiyaan nakitang nagduwa og kalayo sa balay ni Cinco apan giklarong himoan pa kinig dugang pakisusi.

Gibana-banang mokabat sa P420,000 ang danyos sa maong aksidente, samtang sila si Barangay Apas Kapitan Clemente Rosales temporaryong mipahimutang sa mga nasunugan diha sa sports complex sa ilang barangay dili layo sa gikasunugan.

Mao na kini ang ika-limang insidente sa sunog ning bulana diin ang labing ulahi mao ang sunog diha sa Tinago, Pahina Central ug Tisa.