Kini nahitabo diha sa Barangay Caduawan, lungsod sa Tabogon niadtong Martes sa hapon. Ang gitulis mao ang Rough Riders bus nga "Thumper" nga gimaneho ni Rolando Ejar.
Sumala pa sa imbestigasyon sa kapolisan ang maong bus gikan pa sa Cebu South Bus terminal ug padulong ngadto sa Daan Bantayan dihang pag-abot sa maong lugar ang upat ka mga tulisan ang kalit nga mideklarar og tulis.
Apan wala nila damha nga ang pasaherong si Elwood Kipte misukol ug kalit nga miilog sa kalibre .357 rebolber sa usa sa mga tulisan, nianang hitaboa naglumbag panglayat sa bus ang mga suspek.
Nasuta sa nakailog sa armas nga wala diay bala ang armas sa mga suspek, didto na niya kini giturn-over sa Bogo police station.
Walay nakuhang bisan piso ang naratol nga mga tulisan gikan sa mga pasahero.
Samtang sa laing bahin dul-an tunga sa milyon nga salapi ug tseke ang nadala sa mga tulisan nga mitulis sa ASPAC Tabogon branch kagahapon sa hapon, duha sa mga suspek ang nadakpan ug gitumbok nga usa kanila ang mastermind sa grupong nanulis sa mga bangko sa dakbayan sa Sugbo.
Giila ni Sr. Inspector Laurel Almirante ang hepe sa San Remegio Police station sa pakighinabi sa Banat News ang mga suspek mao sila si Jose Roy Quimada,34, lumad nga taga Sta. Lucia Pagadian City ug temporaryong nagpuyo sa dalan Tres de Abril barangay Punta Prinsesa dakbayan sa Sugbo uban sa iyang pag-umangkon nga si Earl Allen Quimada Mondarte,22 anyos ug, tinun-an sa dakong unibersidad nga gidumala sa kaparian sa dakbayan sa Sugbo.
Matud pa ni Almirante nakamonitor sila sa radyo sa kalabot sa pagpanulis diha sa Tabogon diin luwan ang mga suspek sa usa ka Toyota Altis kolor blue nga may plakang XEA-180.
Tuod man ang ilang checkpoint diha sa junction sa Poblacion maoy giagian sa maong awto, ug nagpakaaron ingnon pa ang sakay niini nga gadali ug misutoy hinungdan sa ginukdanay ug pagpasalba sa armas sa mga polis hangtud nga nakorner diha dapit sa munisipyo.
Si Special Operations Group chief, Sr. Insp. Juanito Enguerra sa pakighinabi sa Banat News nagkanayon nga didto nakuha kang Allen ang P20,910 samtang ang cashbox na-recover usab diin dunay sulod nga 29 ka tseke nga nagkantidad og P104,568.99.
Sumala pa ni Enguerra ang nakuha gikan sa ASPAC mao ang P386,000 ug mga tseke. Dugang pa ni Enguerra gibana-banang unom ka suspek ang mihimo sa pagpanulis apan upat lang niini ang misulod sa ASPAC.
Giingong si Quimada maoy mastermind kay kini maoy 'planner' ug 'financier' sa mga operasyon sa Torres-Limotan-Pabriga rob group nga miigo sa mga bangko, pawnshops ug money transfers dinhi sa Sugbo.
Dugang pa ni Enguerra si Quimada dunay pending nga warrant of arrest nga estafa sa Pagadian City apan wala gyud kini maapil sa mga kasong gipasaka batok nila ni Rey Torres ug Danny Limotan gumikan kay dili aktwal nga mouban sa operasyon si Quimada. - Ug Gregg Rubio