Nangulata'g GRO gibalhog

Usa ka tawo nga gibiyaan sa mga higala nga gikainom sa sulod sa karaoke bar ang kalit lang nga nag-wild ug gikulata ang usa ka Guest Relation Officer (G.R.O.).

Nahitabo kini alas 11 pasado ang takna sa miaging gabii sa sulod sa usa ka karaoke bar nga nahimutang sa dalan M.C. Briones sa Guizo, siyudad sa Mandaue.

Si John Cliford Sabio, 36 anyos, minyo nga lumad nga taga Boljoon nagtingkagol karon sa bilanggoan sa kapolisan sa Presinto 1 Centro Police Station sa maong dakbayan human mag-wild sa sulod sa Aljon Karaoke Bar sa dalan M.C. Briones sa barangay Guizo ug gikulata niini ang G.R. O. nga si Pamila (apelyido gipugngan) 28 anyos, minyo nga taga Umapad sa maong siyudad.

Si P03 Miguel Estrada sa kapolisan sa nahisgotang presinto nga gikahinabi sa Banat News miingon nga kalit lang nga nawagtang ang mga kauban sa suspetsado nga gikainom niini.

Dugang pa niya nga mipaingon na usab unta sa paggawas ang suspetsado apan nabantayan kini sa biktima ug gipugngan apan gikasuko sa suspetsado hangtod nga gisukmag ug gidapog niini.

Sumala pa ni Estrada nga hubog ang suspetsado dihang ilang gidakop atol sa ilang sa pagtubag sa maong alarma.