Atol sa interview kang Osmeña sa usa ka estasyonan sa radyo gi-klaru niini nga si konsehal Joy Pesquera ang nangusog aron babagan ang iyang mga programa sama sa planong pagpatuman sa Mobile Alarm Remote System (MARS).
Wala maka-uyon ang mayor sa rekomendasyon sa konsehal ngadto sa konseho nga nisugyot nga ma-tistingan una ang maong sistema una pa hingpit ipatuman.
Kini maoy hinungdan nga gisabot kini ni Osmeña nga "pag mayor-mayor" sa siyudad ug nag-grandstanding sa himoong sesyon sa konseho.
Apil sa gikasagmuyo ni Osmeña mao ang kalangay usab sa pag-aprobar sa gipangayu niya nga P10 milyones nga gahin alang sa himuong pagpangandam sa siyudad aron dili makasulod dinhi sa dakbayan ang sakit nga bird flu.
Gisalikway sab ni Osmeña ang mga giluwatang katin-awan ni bise mayor Michael Rama nga mipadayag atol sa press conference niini niadtong miaging adlaw nga igo lang nilang gisunod ang tukmang proseso sama sa pagpahigayun og public hearing sa dili pa hingpit nga aprobahan ang ordinansahon alang sa pagpatuman sa modernong alarm system ug ingon man ang wala pag-apil sa agenda niadtong milabay'ng sesyon sa gahin alang sa kampanya batuk bird flu.