Tomas manghunaw kun may mga tulis

Manghunaw si Mayor Tomas Osmeña kun dunay laing mga pagpanulis nga mahitabo sa mga bangko dinhi sa dakbayan kun ugaling malangay gihapon og responde ang kapulisan ug malampuson gihapong makalingkawas ang mga suspetsado sa krimen.

Reaksiyon kini sa mayor sa giluwatang pamahayag sa Cebu Bankers Club nga hugtanong nagsupak sa giduso nga programa sa mayor nga pagpatuman og labing moderno nga alarm system ngadto sa mga dagkong establisamento dinhi sa dakbayan sama sa bangko, pawnshop, malls ug department store aron kun dunay mga motumaw nga pagpanulis mahibaw-an dayon kini sa kapulisan sa pipila lang ka segundos.

Atol sa public hearing sa maong ordinansa nga gipasar ni Konsehal Augustus Pe Jr. kabahin sa pagpatuman sa modernong alarm system gipadayag sa bise presidente sa CBC, Harry Uy nga mitambong sa maong public hearing nga dili sila mosagop niini gumikan kay duna nay kaugalingong alarm system nga gitaud ang tanang mga bangko dinhi sa dakbayan.

Gihulagway kini nila nga nag-dobli dobli sa maong sistema ug nagdugang lang sa gastohan.

Bisan pa niini, desidido gihapon ang mayor nga ipadayon sa pagpatuman ang mao niyang laraw gumikan kay gawas sa mga bangko duna pay daghang mga establisamento dinhi sa dakbayan nagkinahanglan maprotektahan gikan sa mga tulisan.

Gisaway sa mayor ang konseho gumikan sa maong grabing kalangay nga gihulagway niyang nakaapektar og dako sa plano niyang pagpalambo sa kahusay ug kalinaw dinhi sa dakbayan.

Giklaro sab sa mayor nga dili pinugsanay ang pagpataod ning mao unyang sistema gumikan kay giawhag lang kadtong mga interesadong establisemento sa pag-subscribe aron makapahimus sa maong alarm system pinaagi sa pagbayad og tag P2 mil ug tag P300 ngadto sa P400 niadtong mga gagmay'ng establisamento ug residential houses.