Dinamitero nasikop sa Talisay

Nasikop sa grupo sa Fishermen Sea and Ecological Care (FISECA) ang duha ka suspetsadong dinamitero og isda niadtong Miyerkules sa buntag diha sa Lagundi reef sakop sa Talisay.

Ang grupo sa FISECA nakadawat og taho diha sa ilang buhatan gikan sa mga residente sa lugar nga duna silay nadungog nga usa ka buto sa dinamita.

Ang mga nasikop mao sila si Rodulfo Tolabing, 38, ug Eduardo Pardillo, 28, pulos mga residente sa Barangay Tangke dakbayan sa Talisay.

Matud pa sa FISECA nga ang mga suspetsado kinsa naditener karon sa Talisay detention cell diha sa Barangay Lawaan, moikyas na unta kini palayo sa lugar diin gilabay ngadto sa dagat ang pipila ka kilong isda nga ilang kuha apan na-corner kini sa mga awtoridad.

Nasakmit sa FISECA gikan sa mga suspetsado ang usa ka unit nga 16 horse power nga motorize nga bangka, usa ka unit nga ½ horse power nga compressor ug uban pang mga gamiton sa panagat.