Level 2 pusher vs. 2 polis nagpinusilay

Nahitabo ang pinusilay tali sa duha ka level-2 drug pushers ug kapolisan sa lungsod sa Tuburan ala una pasado kagahapon sa kaadlawon.

Mitubag og alarma ang kapolisan labot sa pagpangulata nga nahitabo sulod sa usa ka videoke bar sa barangay 4 sa maong lungsod.

Ang nangulata nailhan nga sila si Jefferson Gallarde ug Rolando Barriga, pulos hingkod ang pangidaron samtang ang nakulatahan mao ang usa ka Octavio Rasco.

Ang tag-iya sa videoke bar nangayo og panabang sa kapolisan apan paghiabot nilang SPO3 Raul Jamero ug SPO3 Abita Sarzuelo, nanagan sila si Gallarde ug Barriga ug gipabuthan ang mga polis sa ilang dalang armas.

Mihimo og warning shot ang kapolisan apan nagpadayun ang pagpaboto sa armas sa duha samtang sila nagginukdanay padulong sa barangay 6.

Wala na mopadayon ang kapolisan sa paggukod paghiabot sa ngitngit nga bahin.

Nasuta nga level-2 drug pushers ang mga suspetsado sa maong lugar ug naronda na ang panimaye niini. Hinoon kagahapon nasikop na si Barriga human kini nakit-i nga nagsuroy-suroy sa barangay 6 ug gipasakaan na og kaso.

Nagpaabot pa ang kapolisan sa warrant of arrest aron masikop si Gallarde.

Ang level-2 drug pushers mao kadtong makabaligya og dili mominus 200 gramos nga shabu matag semana.