Lista sa lupon ipasumiter

Gitagalan kutob Nobiyembre 25 ang mga kapitan sa 80 ka barangay sa pagsumiter sa kumpletong listahan sa mga sakop sa Lupon Tagapamayapa aron makapahimulos sa counterpart nga ihatag sa kagamhanan sa dakbayan sa honorarium nga ilang gidawat sa ilang barangay.

Si Jovita Padilla, liaison officer sa Liga ng Lupon Tagapamayapa Philippines, Inc., nagkanayon nga ang Duljo-Fatima, Calamba, Day-as, Guba, ug Pahina Central pa lamang ang mga barangay nga nakasumiter sa listahan.

Si Padilla miingon nga si Konsehal Jocelyn Pesquera miluwat og direktiba pinetsahan Agosto 9 nga naghatag og tagal sa mga kapitan hangtod Septiyembre 25 pagsumiter sa gipangayong mga dokumento. Gumikan sa kapakyas, gisibog kini sa Nobiyembre 25.

Kini nunot sa hangyo sa Liga ngadto ni Mayor Tomas Osmeña nga pun-an ang honorarium sa mga sakop sa Lupon aron moabot na kini og P1,000.

Aron makapahimulos sa counterpart, sumala pa ni Padilla, ang mga kapitan giawhag pagduso ngadto sa Mayor's Office sa listahan sa mga ngalan sa tanang sakop sa Lupon ug gidaghanon sa mga kaso nga gihuptan niini.

Gipangayo usab ang kinatibuk-ang mga kaso nga gihuptan sa Lupon sa matag barangay ug ang sumada sa koleksiyon nga tag P20 kada kaso nga isang-at sa Lupon, lakip na ang sumada sa P50 nga bayad sa paglukat og Certificate to File Court Action.

Mahimong isumiter ang maong mga dokumento sa buhatan sa Liga, matud ni Padilla.