Transport strike: 60-70% pagka-paralisar ang target

Mga 60 ngadto sa 70 porsiyento nga pagka-paralisar sa transportasyon dinhi sa dakbayan sa Sugbo ug mga silinganang siyudad ang target sa lapad nga transport strike nga pasiugdahan sa Alliance of Transport Operator Member Intra City (ATOMIC) nga nagpadayun na ning mga orasa.

Gisugdan ang maong welga sa Atomic inabagan sa Labor Power Council alas 3:00 karong kaadlawon ug plano nila kining tapuson karong hapon.

Gibutyag ni Dennis Derigue, tigpamaba sa maong council atol sa final meeting nila kagahapon duna nay 14 ka mga dagkong rota dinhi sa dakbayan ang mipasalig nang moapil sa welga karong adlawa.

Kini wala pay labot sa mga sakop sa Alyansa sa Nagkahiusang Driber Operator Alang sa Reporma (ANDAR) nga sekretong misempatiya ang mga miyembro sa welga karong adlawa.

Gipaabot pa usab sa ATOMIC nga moapil ang Nagkahiusang Driber sa Sugbo (NADSU) gumikan kay mipasalig na ang kadagkuan niini nga moapil sa maong welga apan nagpaabot na lang kini sa go-signal sa ilang kadagkuan didto sa kaulohan.

Gidugang ni Derigue dihang nahinabi sa Banat News nga mipasalig usab nga mosalmot sa welga karong adlawa ang mga drayber nga nagbiyahi-an sa siyudad sa Talisay, Mandaue ug siyudad sa Lapu-Lapu.

Karong alas dos sa hapon ang pundok sa mga mamumuo ug mga tinun-an ubos sa maong council mag-rally usab kini sa may Gaisano Metro nga salmutan sa mga kawani gikan sa nagkalainlaing kompaniya.

Ang maong welga gitumong aron ipalanog ang hugot nga pagsupak sa pagpatuman sa administrasyon ni Presidente Gloria Arroyo sa reformed value added tax (EVAT).