Sakop sa Torres rob gang nasikop

Alas 3 pasado sa kaadlawon gilibutan sa mga sakop sa Mandaue City Police Office Investigation and Intelligence Division ang giingong hideout sa kanhi sakop sa Torres-Limotan robbery group diha sa St. Anthony Village barangay Sangi dakbayan sa Lapu-Lapu nga miresulta sa pagkasikop niini sa banggiitang sakop niini.



Si Leonardo Abapo alyas Nardo Abapo, hingkod ang panuigon taga barangay Tingub dakbayan sa Mandaue,wala makaipsot sa grupo ni Senior Inspector Jose Liddawa.

Armado sa arrest warrant nga giisyu gikan sa korte sa Lapu-Lapu ug Mandaue gironda sa grupo ni Liddawa ang panimalay nga giabangan ni Abapo. Si Abapo maoy gitumbok nga kauban nila ni Reyruth "Rey" Torres ug Danny Limotan nga mga banggiitang tulisan sa mga pagpanulis dinhi sa Metro Cebu, ang duha ka lider parehong nagtingkagol karon sa Bagong Buhay Rehabilitation Center.

Gitumbok nga gikalambigitan ni Abapo mao ang pagpanulis nga nahitabo sa dakbayan sa Lapu-Lapu lakip na niini ang insidenteng dunay napatay ug laing pagpanulis usab sa dakbayan sa Mandaue.

Si Inspector Ramon Villar ang deputy chief sa intelligence section sa MCPO sa pakighinabi sa Banat News/The FREEMAN mitug-an nga duna nay biktimang estabilisamento nga miila kang Abapo, kini gikan sa Filmins Credit diha sa Ibabao dakbayan sa Mandaue nga gitulis sa miaging semana.

Matud pa ni Villar ang ahente sa Filmins pagkakita pa lang kang Abapo positibo dayong mitumbok kaniya.

Giawhag karon sa MCPO ang tanang mga nabiktima sa pagpanulis dinhi sa Metro Cebu aron pagsusi kang Abapo kung usa ba kini sa mga mibiktima kanila.

Samtang si Cebu City Police Office Criminal Investigation and Intelligence Branch chief, Pablo Labra mitug-an sa Banat News nga si Abapo maoy usa sa mga kauban nila ni Jemuel Cardoza alyas Roldan Villanueva, Junard Saladaga ug Renato Hermosilla ug Limotan pagtulis sa East West Bank niadtong Septembre 26 diin nakakuha sila og kapin P70,000.

Nalambigit usab si Abapo sa pagtulis sa Alcor Trading diin duna nay warrant of arrest batok kaniya, ug ang labing ulahi mao ang pagtulis sa Western Union sa Fuente Osmeña.

Matud pa ni Labra nga dunay posibilidad nga ilang iamendar ang mga nasang-at nang kaso batok nilang Torres ug Limotan ug mga John Does kung dunay motumbok kang Abapo nga usa sa mga nalambigit.

Kusganon hinuon gipanghimakak ni Abapo ang pasangil nga siya nalambigit pa sa pagpanulis. Nangangkon sad siya nga siya ang mitabang sa grupo ni Supt. Labra.- Uban sa taho ni Romeo Limpangog