Cebu malinawon gihapon

Bisan pa og moabot na og 102 ka mga gituohang biktima sa vigilante style nga pagpatay dinhi sa dakbayan gikan niadtong Disyembre sa miaging tuig hangtod karon, pabiling dili kumbinsido si Mayor Tomas Osmeña aron himoong prayoridad sa kapolisan dinhi sa dakbayan ang pagsulbad sa maong estilo sa patay.

Atol sa press conference ni Osmeña kagahapon sa udto gi-klaro niini nga medyo mi-arang- arang karon ang sitwasyon sa kahusay ug kalinaw sa dakbayan kon itandi niadtong mga nangaging katuigan.

Ang labing uwahing biktima sa vigilante killings mao ang 25 anyos nga si Antonio Medina nga gipusil patay sa nag-motorsiklo nga suspek sa gawas nga bahin sa buhatan sa Mobile Patrol Group (MPG) niadtong miaging adlaw.

Nunot niini gipasigarbo sa mayor ang report gikan sa Cebu City Police Office (CCPO) nga nagpakita nga mikunhod og 30 porsiyento ang mga nahitabong petty crime dinhi sa dakbayan karong tuiga kun itandi sa miaging tuig sa susamang kuwarter.

Matud sa mayor nga dunay daghang aspeto ang pagpatunhay sa kahusay og kalinaw nga nagpasabot nga dunay ubang bahin nga luya ang kampanya sa gobyerno kabahin niini.