Daghan nalipay sa vigilante killing - Natuel

Mas daghan ang malipay kay sa masubo niining "vigilante killing" matud pa ni Supt. Mariano Natuel.

Si Natuel kinsa miariya na gikan sa lingkoranan sa hepe sa kapolisan sa Sugbo human mobalik si Supt. Melvin Gayotin gikan sa pagbakasyon, nagkanayon nga ang malipay niining kamatayon sa mga kriminal mao ang mga negosyante ug ang katawhan nga gusto og kalinaw.

Apan dili kalikayan nga masubo gayud ang mga tagtungod o pamilya sa biktima, matud pa ni Natuel.

Alang sa kapolisan ang labing maghatag og labad sa ilang ulo mao kining mga kawatan, isnatser, tulisan, mangingilad ug uban pang kriminal nga mao usay gikalisangan sa publiko.

Miingon si Natuel nga kun mawagtang kining maong mga kriminal malinawon kaayo ang katawhan ug dili usab samok ang palibot sa siyudad.

Sa bahin sa gipamatay sa vigilante nga wala masulbad sa kapolisan, si Natuel miingon nga naatlan lang gyud kanunay nga walay mga polis nga nakakita sa pagkahitabo gyud sa krimen.

Hinuon iyang giangkon nga ning 102 ka gipatay nga mga kriminal ning siyudad may pipila niini nga namatud-ang dili buhat sa vigilante.

Miingon si Natuel nga pagkakaron gipalihok pag-ayo sa kapolisan ang ilang intelligence section sa urban nga lugar, ug ang barangay intelligence network aron makatabang pagsulbad niini.