NADSU dili moapil sa welga

Dako ang kahigayonan nga dili mosalmot ang Nagkahiusang Drayber sa Sugbo (NADSU) sa gitakdang welga nga himuon sa Alliance of Transport Operator Member Intra City (ATOMIC) dinhi sa dakbayan agi og pagsuporta sa National Day of Protest nga gitakdang himoon ugma Huwebes.

Ang presidente sa ATOMIC Rudy Laconza una nang mipadayag nga ilang imbitahon ang tanang transport group sa Sugbo aron magkahiusa sa gi-planong welga aron ipalanog sa gobyerno ang ilang kasagmuyo gumikan ning pagpatuman sa reformed value added tax (RVAT) nga maoy gitumbok nga nakapasamot sa kalisud sa katawhan.

Gibutyag sa presidente sa NADSU Antonio Pogado dihang nahinabi sa Banat News nga gawas nga wala silay nadawat nga imbitasyon tinguha usab nila nga i-apil sa maong welga ang pagduso sa panawagan sa pagbasura sa Oil Deregulation law, pagpalagpot sa puwesto ni Presidente Gloria Arroyo ug ingon man ang mga lokal nga isyu sama sa ilegal nga pagpanakop sa Citom sa ilang mga sakop nga drayber.

Matud ni Pogado andam silang mosalmot sa welga kun hatagan og pormal nga imbitasyon ug sabutan nila og maayo ang maong lakang sa dili pa motakda og petsa sa strike.