Singgit Cebu hosts mireklamo

Misang-at og kiha sa National Labor Relations Commission ang mga hosts ug staff sa show nga Singgit Cebu batok sa GMA7 Networks.

Kini human gihunong sa tagdumala sa maong telebisyon ang maong salida nga walay pahibalo ingon man walay benepisyo nga gihatag ngadto kanila.

Ang mipasaka sa kiha kagahapon sa NLRC mao ang mga hosts nga sila si Lou Dayoc, Jerry Jaqulabon, Carlo Flores ug Mafe Castillo, associate producer Gemini Tolentino ug set designer Nathaniel Nuevas.

Ang mga reklamante mipasangil sa GMA7 Networks nga mitangtang kanila sa trabaho nga walay due notice, wala pagbayad sa holiday pay, 13th month pay, service incentive leave, allowance, separation pay, monthly wages samtang nangayo usab sila og danyos nga financial, emotional ug moral.

Matud pa ni Dayoc nga dili sila gusto nga pabalikon pa sa trabaho gumikan sa ka wala na nila'y salig sa tagdumala nga gipanguluhan ni Ann Mari Tan.

Karong Nobiyembre 10, ang NLRC mitakda sa usa ka preliminary conference.

Ang Singgit Cebu nagsugod niadto pang Oktobre 1999 diin si Dayoc ang usa sa mga original hosts niini samtang kalit lang nga gipahunong niadtong Septiyembre 27.