Fire dept ireklamo's konsehal sa P. Central

Konsehal sa Barangay Pahina Central naglaraw nga mopasaka'g reklamo karong semanaha batok sa mga sakop sa Bureau of Fire Protection sa dakbayan human sa nahitabong sunog diha sa ilang barangay niadtong Sabado sa gabii.

Si Konsehal Sunny Gonzales sa pakighinabi sa Banat News mipasangil nga dugay nga miabot ang mga trak gikan sa Pahina Central ug kun mipatuo pa dayon ang unang firetruck nga iyang gipara ug gihangyo nga pasudlon ngadto sa ilang gibuksang Regino Mercado Elementary School diha sa dalan Panganiban diin ang kabalayan sa luyo nagdilaab dili unta maingon niadto kadako ang gikaon sa sunog.

Tulo ka sitio (sukwahi sa unang na-report) nga mao ang Sitio South Bus Terminal, Sitio Guani ug Sitio Sto. Niño maoy gikaon sa sunog nga giisa sa general alarm diin mikabat og P3.2 milyones ang danyos.

"Ang nakadeperensya nila puwerte nilang dugaya, in-fact akong gipara ang usa sa ilang firetruck wala ko nila tagda," asoy pa ni Gonzales kinsa mitug-ang siya maoy mangusog ug mobarog pagreklamo sa Pahina Central.

Dugang pa niya dihang wala siya tagda sa fire truck miadto nalang siya sa mismong radio room sa Pahina-Central aron mangita'g firetruck nga pasudlon sa Regino Mercado Elementary School.

Sumala pa niya 15 minutos pa una pa makaabot ang firetrucks diha sa fire scene.

Si Cebu City Fire Marshal Supt. Esmael Codilla sa pakighinabi sa Banat News mipasabot nga mas angayan untang gihimo ni Konsehal Gonzales mao ang pakigkita kaniya isip ground commander sa fire scene.

"Naa man tay command system, dapat miduol siya nako, dili man mahimo nga daghan ang mo-command kay magkalandrakas ang atong mga tawo," sumala pa ni Codilla.

Matud pa ni Codilla ang unang konsentrasyon sa iyang mga sakop nga unang nakaresponde diha sa luyong bahin sa City Traffic Office Management ug South Bus Terminal diin ang kusog kaayo ang kalayo.

Giangkon ni Codilla nga naglisod siya og plastada sa iyang mga sakop bisan nakaposisyon na sila gumikan usab ka kahabog sa mga paril ug piot kaayo ang dalan.

Ang pag-ulbo sumala pa ni SFO1 Frank Donoso sa Banat News sa nagsugod sa panimalay nga gipanag-iya ni Nestor Agapay nga usa ka magtutudlo sa usa ka unibersidad. Matud pa dunay mga alegasyon nga nabiyaang lampara maoy nakaingon sa sunog.

Si Agapay ipatawag karong adlawa sa kabomberuhan alang sa imbestigasyon .