Taxi pabutangan AM radio

Dakpon na unya kadtong mga taxi units nga mamasahero dinhi sa dakbayan sa Sugbo ning umaabot nga mga adlaw kun mapakyas kini pagtaud og mga AM radio sets.

Kini sa higayon nga kaaprobahan na unya ang ordinansa nga giduso ni Konsehal Edgardo Labella, tsirman sa Committee on Laws nga nag-obligar sa tanang mga taxi unit nga mamasahero dinhi sa siyudad pagbutang og AM radio sets sa ilang mga yunit.

Gibutyag ni Labella nga tumong niya niining pagpalabang sa maong ordinansa aron makapaminaw ang mga pasahero sa mga balita kabahin sa panghitabo matag karon ug unya sa Sugbo bisan ug anaa kini sa biyahe.

Kini tungod kay nasuta sa konsehal nga dako og ikatabang paghatag og impormasiyon ang mga balita sa radyo ilabi na kun dunay bagyo nga motumaw, mga pagbaha ug lunop ug ingon man kun dunay himuong hot pursuit operation ang kapolisan kabahin sa mga motumaw nga pagpanulis gumikan kay sagad sa mga AM station ang mopahigayon man og live coverage.

Pinaagi niini matabangan usab ang mga drayber sa maong mga taxi units nga makapangita og luwas nga lugar nga maoy ilang agian aron paglikay nga makasugat sa maong panghitabo.

Nalatid sa maong ordinansahon sa konsehal nga kadtong mga taxi units nga masakpang nakalapas ning maong balaodnon ang pamultahon kini og P5 mil ug pagkabilango sa unom ngadto sa usa ka tuig depende sa desisyon sa korte.