Mga balay kalingawan suhiron sa fire department

Ang kabomberohan mosuhid sa lainlaing mga balay-kalingawan dinhi sa dakbayan aron sutaon kun kini nakatuman ba sa gilatid nga safety procedures pinaagi sa pagbutang og tukma nga gidaghanon sa mga fire exit.

Si Supt. Esmael Codilla, fire marshal sa dakbayan sa Sugbo mipasalig sa pagtuman sa awhag ni Mayor Tomas Osmeña nga sutaon ang lainlaing mga balay-kalingawan aron dili mabutang sa peligro ang kinabuhi sa mga tawo nga manulod sa mga establisamento.

Gipasabot ni Codilla nga ang Fire Code of the Philippines dunay gilatid nga gidak-on ingon man tukmang gidaghanon sa mga Fire Exit sa matag balay-patigayon base sa gidaghanon sa mga tawo nga kapasidad sa maong mga establisamento.

Ang kabomberohan wala hinuon maniguro nga madali nila paghuman ang pakisusi nga ilang pagahimuon sa lainlaing mga balay-patigayon, apil na ang mga dapit nga anha magtigum ang katawhan sa pagpahigayon og mga tigum.

Nasayran nga dunay daghang mga establisamento dinhi sa dakbayan wala makatuman sa saktong mga lagda nga gilatid sa Fire Code aron masiguro ang paghatag og proteksyon sa ilang mga kustomer panagana sa mga aksidente nga motumaw sama sa sunog.

Kini tungod kay gawas nga kuwang sa mga fire exit ang pipila ka balay-patigayon, ang agianan paingon sa fire exit gipamutangan og mga babag samata sa mga butang nga adto ra unta angay'ng ibutang sa bodega.

Ang ubang tagdumala sa mga balay patigayon, mibutang usab og kandado sa pultahan sa ilang fire exit.

Gipasabot sa kabombe-rohan nga susama ra kini nga walay pulos tungod kay kun adunay emerhensya, dili gihapon kini dihadiha nga magamit nga kaagian unta sa mga tawo.