Anak ni Mayor Soc nangilkil, namusil?

Anak ni Talisay City Mayor Socrates Fernandez gireklamo ngadto sa kapolisan sa Talisay nga namusil og usa ka drayber sa trak kinsa nagdumili paghatag kaniya og P2,000 nga salapi niadtong Huwebes sa kaadlawon diha sa barangay Tabunok dakbayan sa Talisay.

Apan gipa-blotter sa biktima ang maong insidente mga ala-una na sa hapon sa mao gihapong adlaw.

Ang biktima mao si Gideon Guarin, 27-anyos, taga barangay Libo, lungsod sa Sibonga.

Ang suspetsado mao si Jovan Fernandez kinsa nagserbisyo isip confidential agent sa iyang amahan nga mayor.

Base sa imbestigasyon sa kapolisan sa Talisay nga gibabagan ni Jovan ang forward truck sa biktima aron mohunong kini diin ang maong sakyanan adunay kargang mga uling.

Gisita ni Fernandez ang biktima kun aduna ba kini mga papeles sa iyang karga.

Ang biktima mipakita og mga kumpletong papeles ngadto ni Jovan.

Apan mipasangil ang biktima nga gipangayoan siya ni Jovan og kwarta una siya tugoti nga makabiya bisan og aduna siya'y napakitang mga dokumento.

Wala mohatag ang biktima sa gipangayo ni Jovan ug misakay kini pagbalik sa iyang trak ug mibiya sa lugar diin gigokud kini sa suspetsado ug gipusil tulo ka higayon apan ang bala didto maigo sa cargo box sa iyang sakyanan.

Si Mayor Fernandez nagkanayon kagahapon nga wala siya makahibalo sa maong insidente tungod kay wala motug-an kaniya ang iyang anak.

Si Fernandez mipasangil ngadto sa laing grupo sa vanguard nga basin og maoy namusil ug gigamit lang ang ngalan ni Jovan.

Matud pa ni Fernandez nga dunay mga grupo sa vanguard ang nasuko ni Jovan tungod kay gibisto sa iyang anak ang ilang gibuhat nga pagpangilkil.

Si Fernandez midungag nga ipaimbestigar niya sa kapolisan ang maong insidente diin gipasalig niya nga walay mahitabo nga "white wash" sa imbestigasyon.