Diskuwento sa seniors di ok sa transport group

Mitiyabaw ang mga drayber dinhi sa dakbayan sa Sugbo niining paghingusog sa Land Transportation Office (LTO)-7 sa pagpatuman sa balaod nga naghatag og 20 porsiyento nga diskuwento sa pletihan sa mga senior citizen.

Gipadayag sa presidente sa Alliance of Transport Operators Members Intra City (ATOMIC) Rudy Laconza nga mosamot ang kalisud sa kita nilang mga drayber adlaw-adlaw kun ipatuman ang maong paghatag og diskuwento sa mga senior citizen nga pasahero.

Kini tungod kay alang ni Laconza mahisama na lang unya nga wala sila makapahimulos sa gipatuman nga dugang peso nga umento sa pletihan kung kuhaan pa kini sa diskuwento nga ihatag ngadto sa mga senior citizen nga pasahero.

Kini gumikan kay inay nga P6 ang minimum nga pletihan mobalik man kini ngadto sa naandang pletihan nga tag P5.

Niadtong Sabado ang operations chief sa LTO-7 Vicente Gador Jr. mi-anunsiyo kini sa paghingusog sa pagpatuman sa balaod nga nag-obligar sa mga drayber paghatag og diskuwento sa mga senior citizen atol sa selebrasyon sa Senior Citizens Month nga gipahigayon didto sa South Reclamation Project (SRP).

Gani, gihagit ni Gador ang mga tiguwang nga pasahero nga modangop sa ilang buhatan sa LTO-7 aron mosang-at gyud og reklamo batok niadtong mga drayber nga magmagahi sa paghatag og diskuwento sa pletihan.

Apan alang kang Laconza angay unta nga i-subsidize sa gobiyerno ang paghatag sa maong diskuwento gumikan kay mosamot kalisud ang kita nilang mga drayber gumikan niining padayong pagsaka sa presyo sa mga produktong petrolyo ilabina na sa pagpatuman karong bag-o sa expanded value added tax (EVAT).

Hinuon giangkon ni Laconza nga wala silay mahimo aron supakon ang maong balaod bisan og supak kini sa ilang kabubut-on.