Mga tulisan gisubay

Nagpadayon karon sa pagkuha og mga kasayuran ang mga sakop sa Theft and Robbery Section sa kapolisan sa nahitabong pagpanulis sa usa ka lending firm niadtong miaging hapon.

Kini ang nahipos nga kasayuran kang PO2 Miguel Estrada sa Presinto 1 sa Centro Police Station sa dakbayan sa Mandaue sa follow up nga gihimo kagahapon sa nahitabong pagtulis sa Philmer Credit Corporation nga nahimutang sa Ibabao Estancia sa maong dakbayan.

Matud pa ni PO3 Estrada ang mga sakop sa TRS sa ilang kuwerpo nagpadayon pa karon sa pagpanghipos og mga kasayuran gikan sa mga kawani ug tag-iya sa maong establisamento nga gitulis.

Sa nahibaw-an nga gitulis sa tulo ka tawo nga armado og kalibre 45 nga pistola ug kalibre 38 nga rebolber ang nahisgotang lending firm ug nasakiyo gayod ang mokabat sa P155,000 nga salaping cash niini.

Dugang pa ni Estrada nga daw wala gayod mabalaka nga mailhan ang mga tulisan sanglit wala man gani magtaptap og panapton sa ilang mga nawong.

Sumala pa niya nga hanas na kaayo sa pagpanulis ang maong pundok sanglit milungtad man lang og pipila ka gutlo nga gidugayon dihang ilang gihimo ang pagpanulis ug dali kaayong nakasibat pahilayo sakay sa usa ka motorsiklo.