Tagbalay Gipahimangnuan

Nunot niining adlaw sa mga kalag gipaabot nga mahuot ang mga sam-ang sa mga tawong mobisita sa ilang mga minahal sa kinabuhi nga mitaliwan. Dili usab kalikayan nga gikalipay kini sa mga akyat bahay, kawatan ug ubang dunay dautang tuyo sa uban.

Ang kapolisan mipahimangno sa mga mobiyahe sa ilang probinsya ug kadtong mobisita sa mga sam-ang nga sigurohong nakakandado ang ilang mga balay ug gipawong ang tanang mga electrical appliances aron kalikayan ang sunog.

Si Cebu Provincial Police Office director Supt. Vicente Loot sa pakighinabi sa Banat News mipahimangno sa mga katawhan sa pagsigurong dili magdala og mahalong alahas sa ilang pag-adto sa mga sam-ang aron kalikayan nga matintal ang mga dautang elemento sa katilingban.

Matud pa ni Loot kinahanglang tabangan sa mga residente ang kapolisan aron dili makakita og biktimahon ang mga dautang tawo pinaagi sa security consiousness sa matag tawo.

Si Lapu-Lapu Police director Supt. Louie Oppus nanawagan sa mga sakop sa media aron magpatabang sa pagpahimangno sa katawhan nga siguraduhong ang mga pinuy-anan dili masayon sudlon sa mga kawatan.

Ang Lapu-Lapu City maoy usa sa mga dakbayan sa Metro Cebu nga dunay daghang kaso sa akyat bahay diin ang mga suspek magdala pa og sakyanan atol sa pagpangawat sa mga butang sa balay nga ilang masudlan.

Samtang si Acting Cebu City Police Director, Supt. Mariano Natuel sa pakighinabi sa Banat News nagkanayon iya nang gikasabot ang mga barangay kapitan sa dakbayan nga dunay mga kabalayang sudlunon kaayo ug dili na maabot sa patrol cars, kinahanglang ang ilang mga tanod na ang mohimo sa pagpatrolya.

"Mas maayo kun duna silay silingang kabinlan sa ilang balay ug kun wala gani kinahanglang sarado ang tanan bisan na mga bintana ug ibton gyud ang tanang mga appliances aron malikay ta sa sunog," asoy pa ni Natuel.

Gipanglantawang samtang ang mga tawo nagdasok sa mga sam-ang atol sa kalag-kalag maglibod-suroy usab sa pagpangitag mabiktima ang mga kawatan.