Gasolinahan gitulis sa tulo ka tawo

Mikabat sa P13 mil nga salapi lakip ang 5110 nga cellphone sa cashier ang nadala sa tulo ka wala mailhing tulisan kinsa mitulis sa Petron gasoline station kagahapon sa kadlawon didto sa barangay Sangi dakbayan sa Toledo.

Ang nahisgutang gasoline station gipanag-iya ni Sangi barangay kapitan Victor Girongco.

Matud pa ni Girongco nga unang higayon ang maong insidente sa tulis diin wala siya magdahom nga tulison ang iyang gasoline station hinungdan nga wala siya mokuha og gwardiya.

Si Sangi barangay konsehal Ver Manayon maoy mitaho ngadto sa buhatan sa kapolisan sa dakbayan sa nahisgutang insidente.

Base sa pasiunang imbestigasyon sa kapolisan sa Toledo nga tulo ka wala mailhing tawo kinsa sakay sa duha ka krypton nga motorsiklong kolor itom ug pula nagpaka-aron-ingnon nga mopalit og gasolina.

Ang usa sa maong mga suspetsado miduol ngadto ni Divinicio Elmido, 30, ulitawo, cashier sa maong gasoline station ug dayon ti-on sa pusil ug miingon "tulis ni".

Ang maong suspetsado dali nga mikuha sa nahisgutang salapi ug cellphone dayon balik og sakay sa motorsiklo.

Ang tulo dali nga miikyas paingon ngadto sa Lutopan human sa maong insidente.

Ang mga awtoridad mipahigayon og follow-up nga imbestigasyon sa maong insidente.