Naubol-ubol sa polis

Kritikal ang kahimtang sa usa ka 21-anyos nga lalaki kinsa gikatahapang lider sa mga tulisan human kini pusila sa polis sa Talisay kagahapon sa buntag diha sa likod sa merkado sa Tabunok dakbayan sa Talisay.

Ang biktima mao si Jolito Alisoso alyas "Tatoy" ulitawo residente sa nahisgutang barangay kinsa nakaangkon og usa ka samad pinusilan sa iyang ubol-ubol dali nga gidala diha sa Vicente Sotto Memorial Medical Center niining siyudad ug padayon pa kini nga giatiman sa doktor.

Ang nakapusil mao si SPO1 Florante Gesto polis sa Talisay kinsa nadestino diha sa merkado sa Tabunok.

Matud ni P/Insp. Ricardo Nayne nga ang biktima usa ka rugby boy, lider sa mga tulisan ug kawatan ug suspetsado sa mga kawat nga nahitabo sa siyudad ug nasikop na nila kini sa kasong pagpangawat.

Si Nayne nagkanayon nga si Alisoso maoy suspetsado sa kawat sa ligid sa sakyanan sa usa ka "Zalde".

Gisita ni Gesto si Alisoso kabahin sa nahisgutang kawat apan ang biktima kalit nga milunggob sa gitakin nga pusil sa polis.

Hinungdan nga nahitabo ang panaglayog sa duha diin ang pusil mibuto ug naigo ang biktima.